"Ölü qalır qıraqda, hamı dana axtarır" | Toy süfrəsindən seçilməyən yas mərasimləri

Bu gün yas süfrəsinin menyusunda bircə quş südü yoxdur. Ölü yaxınları ehsan süfrəsini dəbdəbə yarışına çeviriblər. Heç kim bir-birindən geri qalmaq istəmir, belə desək, süfrəsi bir az zəif olanı da topa tuturlar.

İnsanların psixologiyasını yaxşı bilən mərasim zalı sahibləri də hər kəsi razı yola salacaq menyular tərtib edirlər.

Bəs bu yanaşma nə dərəcədə düzgündür?

İlahiyyatçı Tural İrfanın sözlərinə görə, islam dininə əsasən, insanlar yas olan evlərə yemək aparmalıdır ki, mərasim sahibləri çətinlik çəkməsinlər.

İlahiyyatçı deyir ki, bugünkü ehsan pul yığımı və yarışa çevrilib. Həqiqi ehsan isə pulsuz edilən savab işdir.

Sosioloq Üzeyir Şəfiyev də bu halı sosial yarış kimi dəyərləndirir.

“Bu, daha çox göstərmə xarakterlidir, sanki bir sosial yarış yaranıb. Kim daha dəbdəbəli toy edəcək, kim daha dəbdəbəli yas mərasimi keçirəcək?! Burada əsas qazananlar isə şadlıq evləri və mərasim zallarıdır.

Bunu aradan qaldırmaq üçün yuxarı təbəqənin insanları daha təvazökar davranmalı, kasıb insanlar isə onlara baxıb örnək götürməlidirlər”, ‒ sosioloq bildirib.