"Qazdıqca altından qəbir çıxır" | Bu kənddəki 150 illik bəy evi niyə tərk edilib? - KƏNDİNƏ QAYIT

“Kəndinə qayıt” verilişinin yeni buraxılışında Oğuz rayonunun Xalxal kəndinə səfər edilib.

Rayon mərkəzindən cəmi 15 kilometr aralıda, Baş Qafqaz dağlarının cənub ətəyində yerləşən kənd qədim tarixi və zəngin təbiəti ilə diqqət çəkir.

Verilişdə kənd sakini Nəbi Əhmədov ilə həmsöhbət olunub. O bildirib ki, Xalxalda rast gəlinən qədim qəbirlər kəndin tarixinin çox uzaq dövrlərə, alban tayfalarına qədər uzandığını göstərir.

“Burada alban qəbirləri var. Torpaq qazdıqca həmin qəbirlər ortaya çıxır. O qəbirləri mənim babam da görməyib. Çox qədim dövrə aiddir”, – deyə kənd sakini qeyd edib.

Verilişdə həmçinin Tovuzdan Xalxal kəndinə gəlin gələn Zərniyar Nəsibova ilə də söhbət aparılıb. O, həyat yoldaşı ilə tələbəlik illərində tanış olduğunu, atasından çəkindiyi üçün uzun müddət evlənməyə razılıq vermədiyini bildirib.

“Atamdan qorxurdum. Demişdim ki, elçi göndərərsən, atam versə gələrəm. Verməsə, arxamca gəlmə. O da sözünə əməl etdi, arxamca gəlmədi”, – deyə Zərniyar Nəsibova bildirib.