"Qurban kəsməyin" deyənlər o halda səmimidir ki... | Dinlərdə qurban anlayışı - AMİN

“Amin” verilişinin yeni buraxılışı yayımlanıb.

Verilişin budəfəki sayında əksər dinlərdə olan qurban anlayışı mövzusu ətrafında müzakirə aparılıb.

İlahiyyat Universitetinin rektoru Aqil Şirinov “qurban”ın etimologiyasından danışarkən qeyd edib ki, bu söz dilimizə ərəbcədən keçib:

“Qurb” kəlməsi ərəb dilində “yaxınlaşmağı” bildirir. Qurban da Allaha yaxınlaşmağı ifadə edir. Tarixə nəzər yetirdikdə görürük ki, əksər dinlərdə qurban ibadəti var. İnsanlar bu ibadəti bir növ Allaha yaxınlaşma vasitəsi kimi görüblər”.

Aqil Şirinov bildirib ki, yəhudilikdə qurban əsas ibadət növü olub:

“Süleyman” məbədi mövcud olduğu müddətcə yəhudilərdə sözügedən ibadət icra olunub. Romalılar tərəfindən sonuncu dəfə məbəd dağıdıldıqdan sonra artıq ortodoksal yəhudilikdə qurban ibadəti bildiyimiz şəkildə qalmayıb.

Xristianlığa gəlincə, qurbanın insan qurbanı, yəni İsa ilə əvəz edildiyini görürük. Xristianlıq Həzrət İsanın özünü qurban kimi təqdim edir. Bu dində ilk insanların etdiyi hərəkətə görə insanlar günahkar hesab edilirlər və İsa gəlib onların günahına görə özünü qurban verir.

İslama gəlincə isə görürük ki, yəhudilikdə olan qurban ibadəti ilə İslamda olan qurban anlayışı bir-birinə xristianlıqdan daha yaxındır”.

A.Şirinov “Qurban bayramında heyvanları kəsməyin” deyənlərin fikrinə münasibət bildirib:

“Bu iddianı irəli sürənlərin bir qisminin səmimiyyətinə inanıram, digərlərinin isə yox. O zaman səmimiyyətə inanmaq olar ki, həmin insanların özləri ət yeməsinlər. Amma bunu deyənlərin çoxu gündəlik həyatlarında ət yeyirlər. Üstəlik, İslamın qurban ibadəti bir tərəfdən bizim təqvamızı göstərirsə, digər tərəfdən də xeyirxahlıqdır. Yəni həmin ət insanlara paylanılır”.