"Saçlarımı məzar daşına qoymuşam..." | 19 yaşlı 20 Yanvar şəhidinin faciəvi taleyi - Baku TV

20 Yanvar faciəsi zamanı şəhid olan qəhrəmanlardan biri də Firuz Cabbarovdur.

O, hələ 19 yaşında ikən Vətənin azadlığı uğrunda şəhadət şərbəti içib.

Əslən Kəlbəcər rayonundan olan Firuz Cabbarov təhsil almaq üçün Bakıya gəlib və həmin dövrdə baş verən haqsızlıqlara, xalqımızın başına gətirilən müsibətlərə səssiz qala bilməyib

Şəhidin bacısı Gülanə Cabbarova qanlı Yanvar hadisəsini və sonrasında yaşananları Baku TV-yə danışıb.

Onun sözlərinə görə, ailə bir neçə gün Firuzdan xəbər ala bilməyib: “Üç gün sonra axşam qardaşımı gətirdilər, tankların arasında qalmışdı. Atam onu yaşatmağa çalışdı, amma mümkün olmadı, çünki çox ağır xəsarət almışdı”.

O bildirib ki, qardaşı son anlarınadək Vətənə bağlılığından dönməyib:

“Qardaşım söylədi ki, onlara “gəncsiniz, çıxın tankların qarşısına, bəlkə gəncliyinizə bağışlayarlar” deyiblər. Tələbələr də ələ-ələ verib tankların qabağına çıxdılar”.

Gülanə Cabbarova qeyd edib ki, qardaşı ona hər zaman xüsusi qayğı göstərərmiş: “Saçlarımı həmişə özü darayardı, saçlarıma gül qoyardı. Şəhid olanda isə mənə dedi ki, məndən sonra saçlarını kəs. Mən də saçlarımı kəsib onun məzarına qoydum”.