"Soruşun, görün vergi verir?!" | Ev sahibi ustanı işlədib, pulunu vermədi

Baku TV-nin “Qayanar xətti”nə müraciət edən usta Elsəvər Babayev iddia edir ki, müqavilə bağlamadan bir şəxsin evində təmir işləri görüb, lakin qarşı tərəf ona vəd edilən məbləği ödəməyib.

Redaksiyamız belə hallarla üzləşməmək üçün hansı addımların vacib olduğunu araşdırıb.

Mütəxəssislər əmək münasibətlərinin rəsmiləşdirilmədiyi danışıqlardan uzaq durmağı məsləhət görürlər.

İqtisadçı Xalid Kərimlinin sözlərinə görə, xidmət göstərən şəxslərin fəaliyyəti mütləq qaydada sənədləşdirilməlidir:

“Ustalar və ya təmir xidməti göstərənlər VÖEN almalı, ödənişlər də həmin VÖEN üzrə bank hesablarına köçürülməlidir. Vergidən yayınmaq məqsədilə müqavilədən yayınanlarda sonradan ciddi problemlər yaranır”.

Hüquqşünas Vüsal Cəfərov isə qeyd edir ki, podrat və digər mülki müqavilələrlə görülən işlərə əmək qanunvericiliyi şamil edilmir:

“Belə xidmət göstərən şəxslər yazılı və ya şifahi müqavilə əsasında ödəniş tələb edə bilərlər. Amma işin xarakteri və davamlılığı əmək münasibətlərinin yaranmasına imkan verirsə, artıq əmək müqaviləsi bağlanmalıdır. Əmək müqaviləsi olmadan işçi işlədənlərə qarşı həm inzibati, həm də cinayət məsuliyyəti nəzərdə tutulub”.