"Suya da, işığa da həsrətik" | Acınacaqlı durumda yaşayan sakinlərin şikayəti həll ediləcək?

10 mindən çox əhalisi olan Biləsuvarın Xırmandalı kəndində illərdir içməli su problemi hökm sürür.

Baku TV-nin “Qaynar xətt”inə müraciət edən sakinlər problemin həll olunması üçün aidiyyəti qurumdam kömək gözlədiklərini bildiriblər.

“Arxın içi pamperslə doludur. Suyu götürüb hovuza doldururuq, daha sonra duruldub içirik”, ‒ sakinlərdən biri söyləyib.

Sakinlərin problemi bununla da bitmir. Onların sözlərinə görə, kəndin bir hissəsində elektrik xətləri yenilənsə də, digər hissədə dirəklər və naqillər yararsız haldadır.

“Evdə işıq üzünə həsrətik. Külək əsən kimi işıqlar sönür. Televizorumuz dəfələrlə yanıb”, ‒ deyə başqa bir sakin narazılığını ifadə edib.

Məsələ ilə bağlı “Azərişıq” ASC-dən bildirilib ki, həmin kənd artıq lahiyələndirilib. Hazırda qonşu kənddə işlər aparılır. Növbəti mərhələdə sözügedən kənddə layihənin icrası həyata keçiriləcək.

Biləsuvar Su-Melorasiya Sistemlərinin İstismarı İdarəsindən isə vurğulanıb ki, kəndi su ilə təmin etməli olan kəmərin tikintisinin davamı üçün layihə artıq təqdim edilib. Yaxın günlərdə problemin həlli istiqamətində işlər həyata keçiriləcək.