"Vətəndaşın səkisində satırsansa, sənin deyil" - Sumqayıtdakı qalmaqal necə nəticələndi? - Baku TV

Son günlər Sumqayıtda küçə ticarətinə qarşı keçirilən reyd zamanı çəkilən görüntülər sosial şəbəkələrdə sürətlə yayılıb.

Xüsusilə həmin kadrlarda icra nümayəndəsinin satıcının məhsulunu müsadirə etməsi və onunla ünsiyyət tərzi geniş müzakirələrə səbəb olub.

Məlumdur ki, piyadalar üçün nəzərdə tutulan səkilərdə satış aparmaq və ümumilikdə küçə ticarəti ilə məşğul olmaq qanunvericiliklə qadağandır. Lakin vətəndaşa məxsus məhsulun götürülərək “bu mal artıq sənin deyil” deyilməsi hüquqi baxımdan mümkündürmü?

Hüquqşünas Vüsal Cəfərovun sözlərinə görə, İnzibati Xətalar Məcəlləsinin 454-cü maddəsinə əsasən, müvafiq icra hakimiyyəti orqanı tərəfindən müəyyən edilməmiş yerlərdə malların satılmasına, yaxud işlərin və xidmətlərin göstərilməsinə görə 80 manat məbləğində cərimə nəzərdə tutulur.

O bildirib ki, İnzibati Xətalar Məcəlləsinin 26.2-ci maddəsinə əsasən, inzibati xətanın törədilməsində alət və ya inzibati xətanın bilavasitə obyekti olmuş predmetin müsadirəsi yalnız hakim qərarı ilə tətbiq edilə bilər. Bu halda isə məhsullar inzibati xətanın bilavasitə obyekti hesab olunduğundan onların müsadirəsi yalnız məhkəmə qərarı əsasında mümkündür. Satıcının sözlərinə görə, müsadirə olunan meyvələr sonradan ona geri qaytarılıb:

“Bir səhv etmişdi, özü də başa düşdü. Gətirib qaytardı. Əgər səhvini anlamasaydı, qaytarmazdı”.