"Yaman gündədir, dərdimizi kimə deyək?!" | Dəhşətli durumda qalan sakinlər etiraz etdi - Baku TV

Sabunçu rayonunun Pirşağı qəsəbəsində yolun uzun illərdir yararsız vəziyyətdə olması sakinlərin gündəlik həyatında ciddi problemlər yaradır.

Vətəndaşlar bildirilər ki, asfalt örtüyü olmayan küçədə yağışlı havalarda palçıq və su gölməçələri yaranır, quru havalarda isə ərazi toz içində qalır.

Sakinlərin sözlərinə görə, güclü yağış zamanı həyətləri, evləri və zirzəmiləri su basır. Küçədən keçmək isə demək olar ki, mümkünsüz olur.

“2020-ci ildən burada yaşayıram. Mən gələndə küçələr bundan da pis vəziyyətdə idi. Qonşular ötən il öz hesablarına yolu müəyyən qədər düzəldiblər. Bir ay əvvəl mən də 200 manat verib həyətə daş tökdürmüşəm. Amma yenə keçmək mümkün deyil. Bilmirik, dərdimizi kimə deyək”, – deyə sakinlərdən biri bildirib.

Yolun bərbad vəziyyətdə olması nəqliyyatın hərəkətinə də mane olur. Sakinlərin bildirdiyinə görə, bəzi taksi sürücüləri, hətta təcili tibbi yardım briqadaları belə ünvana gəlməkdə çətinlik çəkirlər.

Sakinlər küçədə işıqlandırma sisteminin də olmadığını deyirlər. Avtobus dayanacağının yaşayış ərazisindən xeyli uzaqda yerləşməsi isə onların gündəlik gediş-gəlişini daha da çətinləşdirir.