"Yaxşılıq etdiyin yerdən zərbə alacaqsan" | İnsan bu dünyaya niyə gəlib? - AMİN

“Amin” verilişinin budəfəki buraxılışında aktyor Kamal Yaşar və ilahiyyatçı Elnur Əzimli ilə yaxşılıq mövzusu müzakirə olunub.

Kamal Yaşar yaxşılıq anlayışına öz baxışını belə ifadə edib:

“Yaxşılığı hansı tərəfdən ölçsək, yaxşıdır. Yaxşılıq əbədi bir kapitaldır. Mənim üçün itməyən bir kapitaldır və daim aktualdır. Yaxşılıq etmək, əslində, insanın özünə yatırımıdır. Yaxşılıq etdikcə ondan güc də tapmağa başlayırsan”.

Onun sözlərinə görə, bəzən yaxşılıq etdiyiniz şəxslərdən sərtlik və dönüklük görmək mümkündür:

“Amma bu, yaxşılıqdan imtina etməyə əsas vermir. Bu, bir düzəndir. İkinci bir nüans isə budur ki, yaxşılığı yalnız özün üçün etmə. Yaxşılıq olunmalıdır. Bu, Yaradanın tövsiyəsidir. Sənə deyilən budur ki, yaxşılıq et. Əvəz gözləmə. Sən sına da bilərsən, zərbə də ala bilərsən, amma sənin işin yaxşılıq etməkdir”.

İlahiyyatçı Elnur Əzimli isə bildirib ki, insanların dünyaya gəlmə səbəblərindən biri də Allahı tanımaqdan sonra xeyir əməllər işləməkdir:

“Sadə əməllər Allah rizası üçün edilən faydalı əməllərdir. “Qurani-Kərim”də buyurulur ki, iman gətirən və saleh əməllər görənlər yaradılmışların ən xeyirliləridir. Bu, Allahın həmin xeyirxah insanlar üçün ifadə etdiyi termindir”.