Qurumdan Xırdalanda kəsilən ağaclarla bağlı vacib açıqlama | Hadisə yerindən anbaan görüntülər

Xırdalan şəhərindəki Heydər Əliyev adına parkda ağacların kəsilməsi barədə “Baku TV”nin qaynar xəttinə müraciət daxil olub.

Vətəndaş parkdakı çoxillik ağacların kütləvi şəkildə qeyri-qanuni qırıldığını iddia edib.

Məsələ ilə bağlı Abşeron Rayonu İcra Hakimiyyətindən bildirilib ki, Xırdalan şəhəri ərazisində mövcud olan şam ağaclarının, o cümlədən digər həmişəyaşıl ağac və kol bitkilərinin son bir il ərzində kütləvi şəkildə quruması müşahidə olunub:

“Məsələ ilə bağlı Abşeron Rayon İcra Hakimiyyəti tərəfindən Ekologiya və Təbii Sərvətlər Nazirliyinə müraciət olunub, qurumanın səbəblərinin araşdırılması və qurumuş ağacların götürülməsi, eyni zamanda yerində yeni tinglərin əkilməsi istiqamətində rəy verilməsi xahiş olunub.

Qurum tərəfindən araşdırma aparılmış və ağacların götürülməsi, yeni tinglərin əkilməsi ilə bağlı müvafiq rəy verilib. Verilmiş rəy əsasında Xırdalan şəhərindəki Heydər Əliyev adına parkda 292 ədəd şam ağacının götürülməsi prosesinə başlanılıb.

Əlavə olaraq bildirək ki, götürülmüş quru ağacların ünvanları koordinatlar və say olmaqla aidiyyəti qurumların iştirakı ilə qeydiyyata alınıb. Hazırda yay mövsümü olduğundan yeni tinglərin əkilməsi mütəxəssislər tərəfindən məqsədəmüvafiq hesab olunmadığından payız aylarında yeni ağacların əkilməsi nəzərdə tutulub”.