Qurumlar niyə “çarəsiz”dir? | Sakinlər suyun binaların zirzəmisini basmasından şikayətləndi

Paytaxtın 8 Noyabr prospekti, Cavanşir küçəsində yerləşən binaların zirzəmilərini kanalizasiya suları basıb.

Sakinlər deyir ki, illərdir kanalizasiya suları binanın zirzəmisinə axıdılır.

“50 ildir binanın kanalizasiya sistemi təmir olunmur. Müvafiq qurumlara dəfələrlə müraciət etsək də, lazımi tədbirlər görülmür”, – deyə sakin şikayətini bildirib.

Problemlə bağlı Xətai Rayon İcra Hakimiyyətindən bildirilib ki, sözügedən əraziyə baxış keçirilib, zirzəmiləri qurunt suları ilə dolmuş binaların siyahısı rəsmi şəkildə İri Şəhərlərin Birləşmiş Su Təchizatı Xidmətinin Xətai Rayon Sukanal İdarəsinə verilib.

“Binaların birinin zirzəmisindəki tullantı su xəttində baş verən qəza isə hazırda aradan qaldırılır. Problemin köklü həllinə nail olmaq üçün həmin suları axıtmaq məqsədilə drenaj sistemi qurulmalıdır. Binaların çökək ərazidə yerləşməsi bu prosesin həyata keçirilməsini çətinləşdirir. Alternativ layihələr ətrafında araşdırmalar aparılır. Uyğun və müvafiq tədbirlər görüləcək”, – qurumdan əlavə edilib.