Sakinlərin səbri daşdı | Bakıda əhalinin kabusu olan beton zavodu

Paytaxtın Yeni Yasamal yaşayış massivinin sakinləri bu ərazidə yerləşən beton zavodundan ətrafa atılan tullantı, xüsusən də toz, dumandan şikayətçidirlər.

Sakinlər iddia ediblər ki, zavodda borulardan çıxan sement həyətlərinə dolur. Bu səbəbdən vətəndaşlar həyətə belə çıxa bilmirlər:

“Həyətdə paltar sərə bilmirik. Uşaqlarımız çölə çıxa bilmirlər. Yayda hava almaq, həyətdə oturmaq mümkün deyil. Dəfələrlə aidiyyəti qurumlara müraciət etmişik, amma şikayətimizə baxılmır”.

Hər gün, xüsusilə də gecə saatlarında sement udmağa məhkum olan sakinlərin şikayəti ilə bağlı Yasamal Rayon İcra Hakimiyyətindən bildirilib ki, qurum əməkdaşları Baku TV-nin çəkilişindən sonra əraziyə baxış keçiriblər. Vəziyyətlə bağlı nə iş görüləcəyi və yaşayış evlərinin yaxınlığında zavodun niyə tikildiyi ilə bağlı araşdırma aparılacağı qeyd olunub.

Ekologiya və Təbii Sərvətlər Nazirliyindən isə ərazidə monitorinq aparıldıqdan sonra ictimaiyyətə məlumat veriləcəyi bildirilib.