Sel suları torpaq sürüşməsini aktivləşdirdi | Quba sakinləri qorxu içində

Quba rayonunun Küpçalqışlaq kəndində tez-tez torpaq sürüşmələri qeydə alınır. Son vaxtlar isə bu proses daha da aktivləşib. Qudyalçayın kənarında baş verən uçqunlar nəticəsində artıq kəndə gedən əsas yol tamamilə yararsız vəziyyətə düşüb. Evlər üçün isə təhlükə yaranıb.

“Kəndimiz çox təhlükəli vəziyyətdədir. Qudyalçay məcrasından çıxıb. Yolumuz bağlanıb. Evlərimiz uçmaq üzrədir”, – kənd sakini Bəxtiyar Ağabalayev söyləyib.

Quba Su Meliorasiya Sistemlərinin İstismarı İdarəsindən bildirilib ki, rayonun Küpçalqışlaq kəndi ərazisində Qudyalçayın normadan artıq artması səbəbindən adıçəkilən kəndə gedən avtomobil yolunun bir hissəsi yuyularaq yararsız vəziyyətə düşüb:

“Ərazidə məcra tənzimləmə və sahil bərkitmə tədbirləri görülüb. Burada daha böyük qoruyucu bəndin tikilməsi üçün təkliflər hazırlanaraq Dövlət Su Ehtiyatları Agentliyinə təqdim olunub. 2025-ci ilin istismar tədbirləri planında həmin ərazidə qoyucu daş beton bəndin tikintisi nəzərdə tutulur”.