Səsdəki xırıltı təhlükəlidir? | Həkim həyəcan təbili çaldı

Xərçəng xəstəliyi insanları adətən qəfil haqlayır.

Ölümcül bəlanın gizli əlamətləri var. Stres, yaş və vitamin çatışmazlığı ilə əlaqələndirilən narahatlıqlar da xərçəng əlaməti ola bilər.

Rusiyalı onkoloq Yevgeni Ledin bildirib ki, simptomların spektri genişdir.

“Onların arasında daha tipik, klassikləri ayırd edə bilərik: izah edilməyən çəki itkisi, bədəndə top formasında yaranan şişlər, uzun müddət izah olunmayan ağrılar, nəcisdə qan olduqda sağlamlıq barədə narahat olmağa dəyər. Bura kritik hal istisnası ilə öskürək zamanı qan gəlməsi də aiddir”, – deyən Y.Ledinin sözlərinə görə, sevimli ət yeməkləri ikrah yaradırsa, bu da həyəcan təbili çalmağa əsasdır. Bu simptom maddələr mübadiləsində dəyişikliklər və bədənin bədxassəli hüceyrələrin varlığına reaksiyası ilə əlaqələndirilir.

Həmçinin yemək udmaqda çətinlik çəkirsinizsə, bu, özofagus şişinin olduğunu göstərə bilər. Bu udma problemi iki həftədən çox davam edərsə, xüsusən də ürək yanması, ağrı və ya kilo itkisi, ağız qoxusu ilə müşayiət olunarsa, həkimə müraciət etməlisiniz.

Mütəxəssisin fikrincə, iki-üç həftə ərzində soyuqdəymə yoxdursa, səsin xırıltısı və ya səs tellərinin gərginləşməsi ilə üzləşənlər həkimin qəbuluna yazılmalıdırlar.

“Ağızda bir neçə həftə ərzində sağalmayan yara və ya xoraların olması ağız, boğaz xərçənginin erkən əlaməti ola bilər. Bu simptom siqaret çəkənlərdə, mütəmadi olaraq spirtli içki qəbul edən insanlarda, həmçinin protez taxanlarda da olur”, – deyə Y.Ledin xəbərdarlıq edib.