Şəxsiyyət vəsiqəsini girov saxlayanlar cərimələnə bilər

Şəxsiyyət vəsiqəsini girov saxlayanlar cərimələnə bilərlər.

Belə ki, mağazalardan kirayə paltar götürüldüyü zaman müştərinin şəxsiyyət vəsiqəsi girov olaraq tələb olunur. Halbuki şəxsiyyət vəsiqəsinin girov olaraq götürülməsi qanunsuzdur və həmin satıcılar cərimələnə bilərlər.

Hüquqşünas Anar Qasımlı deyir ki, qanunvericiliyə görə, şəxsdən yalnız hərbi xidmətə çağırış zamanı, hərbi təhsil müəssisəsində təhsil alarkən və ya şəxs barəsində ev dustaqlığı tədbiri seçildiyi halda şəxsiyyət vəsiqəsi girov götürülə bilər.

“Hər hansı alqı-satqı zamanı, borc götürəndə və bu kimi başqa hallarda şəxsiyyət vəsiqəsinin girov qoyulması tamamilə qadağandır. Bu hallarda şəxsiyyət vəsiqəsini girov götürən şəxslər bilməlidirlər ki, onları 500 manatdan 800 manatadək cərimə gözləyir”, – deyə o qeyd edib.