Sosial şəbəkələrdə kosmetik məhsulların reklamı düzgündür? - Baku TV

Tiktoker Ləman sosial şəbəkədə reklam etdiyi pilinqi bir neçə dəfə üzünə tətbiq etdikdən sonra dərisində yanıqlar yaranıb.

Ümumiyyətlə, son aylarda sosial şəbəkələrdə turşu əsaslı pilinqlərin, həmçinin “sarı” və “qırmızı” serumların reklamı kəskin şəkildə artıb.

Bəs belə məhsulların həkim məsləhəti olmadan istifadəsi nə dərəcədə doğrudur?

Dermatoloq Sevinc Məmmədova bildirir ki, bu məhsulları hər kəs istifadə edə bilməz:

“Çünki hər dəri tipi eyni deyil. Belə məhsullar həkim məsləhəti ilə istifadə olunsa, daha yaxşı olar”.

Marketinq üzrə mütəxəssis Laura Seyidbəyova isə qeyd edib ki, Azərbaycanda tibbi məhsulların reklamı “Reklam haqqında” qanunla tənzimlənir:

“Tibbi kosmetik məhsulların reklamı yalnız icazə verilən formada yayımlana bilər. Bu reklamlarda xəbərdarlıq və əks-göstərişlə bağlı məlumat mütləq göstərilməlidir. Reklam istehlakçını çaşdırmamalıdır”.

Mütəxəssis bildirir ki, digər ölkələrdə bu kimi məhsullar xüsusi risk qrupuna daxil olduğundan həkim tövsiyəsi əsasında istifadə olunur. Blogerlərə isə tibbi təhsilləri olmadığı üçün bu cür reklamlar etmək qadağan olunmalıdır.