Sumqayıtda şəhid bulağının ətrafını çirkləndirdilər

Sumqayıt şəhərinin Azərbaycan prospektində şəhid Niyaz Əliyevin adına yaradılan bulağın ətrafının natəmizliyi sakinlərin narazılığına səbəb olub.

Şikayətçilərin sözlərinə görə, bulağın ətrafı yaxınlıqda yerləşən iaşə və ticarət obyektlərinin işçiləri tərəfindən çirkləndirilir. Bu da ərazidə antisanitar vəziyyətin yaranmasına səbəb olur. Ətrafda yerləşən obyektlərin işçiləri isə iddiaları əsassız hesab edirlər.

Səsləndirilən şikayətlərdən Sumqayıt Şəhər İcra Hakimiyyəti də məlumatlıdır. Qurumdan şifahi olaraq bildirilib ki, digər ərazilərdə olduğu kimi sözügedən ərazidə də mütəmadi olaraq təmizlik işləri aparılır, əraziyə nəzarət olunur. Ancaq bəzən sakinlərin də təmizliyə riayət etmələrinə ehtiyac yaranır.

İcra Hakimiyyətindən o da qeyd edilib ki, sözügedən ərazinin daima təmiz saxlanılması üçün ətraf sakinlərin də təşəbbüs göstərmələri arzuolunandır.