Sumqayıtda uşaqlar üçün yardım mərkəzi yaradılıb
“Sumqayıtda məişət zorakılığından əziyyət çəkən uşaqlara yardım mərkəzi layihəsi yaradılıb. Bu layihə çərçivəsində 324 nəfərə sosial-psixoloji tibbi xidmətlər göstərilib. Bakı şəhəri, Cəlilabad və Şəki rayonlarında məişət zorakılığından zərərçəkmiş şəxslər üçün yardım mərkəzləri təşkil olunub”.
Bu barədə əmək və əhalinin sosial müdafiəsi naziri Sahil Babayev dekabrın 6-da Bakıda keçirilən "Məişət zorakılığının qarşısının alınması: imkanlar və perspektivlər" mövzusunda beynəlxalq konfransda çıxışı zamanı deyib.
Nazir bildirib ki, paralel olaraq sosial sığınacaqların inkişafına dəstək layihəsi çərçivəsində həm "Azərbaycan Uşaqları", həm də "Təmiz Dünya" və "Ümid Yeri" xeyriyyə cəmiyyətləri ilə sosial sifariş müqavilələri imzalanaraq onların fəaliyyətinə dəstək verilib:
"Bu üç sosial sığınacağımız bu sahədə ən aktiv fəaliyyət göstərən sığınacaqlardır. Onların fəaliyyətinin dəstəklənməsi istiqamətində ardıcıl işlər görüləcək”.