Şuşadan videolar çəkib, erməniyə göndərən Fidan saxlanıldı

Dövlət Təhlükəsizlik Xidməti əməkdaşlarının əldə etdiyi bu səs yazıları 20 yaşlı Fidan Əliyevanın Ermənistan xüsüsi xidmət orqan əməkdaşlarından biri ilə “Telegram” platforması üzərindən danışığı zamanı qeydə alınıb.

“Trend”in məlumatına görə, Laçın-Xankəndi yolunun Şuşa ərazisindən keçən hissəsində 2022-ci il dekabrında başlayan və 138 gün davam edən etiraz aksiyasının iştirakçıları arasında o da olub.

Fidanın “Telegram” platforması üzərindən tanış olduğu Ermənistan xüsusi xidmət orqanı əməkdaşına məlumatlar, video və fotoşəkillər göndərdiyi iddia edilir. Görüntülərin bir hissəsinin Bakının müxtəlif yerlərindən olduğu bildirilir.

Məhkəmədə ifadə verən Fidan Əliyeva bildirib ki, “Telegram”da tanış olduğu adamı rusiyalı zənn edib. Onun sözlərinə görə, həmin şəxslə də məlumat ötürmək üçün yox, şəxsi məqsədlə tanış olub. “Əvvəl heç onun erməni olduğunu bilməmişəm. Məqsədim adi insan kimi tanışlıq olub. Başqa məqsədim – Azərbaycan barədə məlumat vermək niyyətim olmayıb”, – deyə o əlavə edib.

Foto-video məsələsinə gəlincə, Fidan Əliyeva bildirib ki, qarşı tərəf ondan bəzən müəyyən yerlərdə görüntülərini çəkib göndərməsini istəyirdi, o da göndərirdi.

İş materiallarından isə görünür ki, gənc qız gizlin danışdığı Ermənistan xüsusi xidmət orqanı əməkdaşının istəyi ilə Laçın-Xankəndi yolunda başlanan etiraz aksiyasına qoşularaq oradan foto və video materiallar çəkib həmin şəxsə göndərib. Fidan Əliyeva ekofəalların olduğu bu videoları nə məqsədlə çəkib həmin şəxsə göndərdiyi sualına aydınlıq gətirməyib. Onun işi üzrə məhkəmə araşdırmaları davam edir.

Qeyd edək ki, Fidan Əliyeva Ermənistana casusluqda, bu ölkənin xüsusi xidmət orqanının əməkdaşları vasitəsilə Azərbaycan haqda məlumatlar ötürməkdə ittiham olunur. Ona Cinayət Məcəlləsinin 274-cü, yəni dövlətə xəyanət maddəsi ilə ittiham verilib. Bu maddənin sanksiyasında 20 ilə qədər və ya ömürlük azadlıqdan məhrumetmə cəzası nəzərdə tutulub.