Taleh Qaraşov məhkəməyə niyə gəlmədi? - Sui-qəsd cəhdi ilə bağlı gizli detallar

Lənkəranın icra başçısı Taleh Qaraşova sui-qəsdə cəhddə təqsirləndirilən Bəhruz Əskərovun cinayət işinin növbəti məhkəmə prosesi keçirilib.

Bakı Ağır Cinayətlər Məhkəməsində hakim Səbuhi Hüseynovun sədrliyi ilə keçirilən prosesdə cinayət işində zərərçəkən qismində tanınan Lənkəranın icra başçısı Taleh Qaraşovun nümayəndəsi, vəkil Taleh İbrahimov özünü məhkəməyə təqdim edib.

Zərərçəkənin nümayəndəsi Taleh Qaraşovun prosesə gəlmədən ibtidai istintaqa verdiyi ifadəsini təsdiq etməsini məhkəmənin diqqətinə çatdırıb. Buna görə də Taleh Qaraşovun ibtidai istintaqdakı ifadəsi prosesdə elan edilib.

Zərərçəkən icra başçısı vurğulayıb ki, o təqsirləndiriləni istintaqa qədər heç vaxt tanımayıb.

"Onun sui-qəsd planları barədə mətbuatdan xəbər tutmuşam. Bununla yanaşı, kiminsə məni güdməsini, izləməsini heç vaxt hiss etməmişəm", ‒ deyə T.Qaraşov ifadəsində qeyd edib. Zərərçəkənin nümayəndəsi Taleh Qaraşovun təqsirləndirilənə qarşı hər hansı maddi təzminat iddiasının olmadığını, amma təqsirləndiriləndən şikayətçi olduğunu məhkəmənin diqqətinə çatdırıb.

Aprelin 29-da keçirilməsi nəzərdə tutulan növbəti proses şahidlərin ifadələri ilə davam edəcək.

Qeyd edək ki, Bəhruz Əskərov respublikanın müxtəlif rayonlarında yaşayan şəxsləri gizli əlaqəyə cəlb edərək onlara Lənkəran Şəhər İcra Hakimiyyətinin başçısının həyatına sui-qəsdin təşkil olunması barədə tapşırıqlar verməkdə ittiham olunur.

Həmçinin Bəhruz Əskərovun əlaqəsində olan şəxslərə Azərbaycanın bəzi rayonlarında fərdi qaydada ingilis dili müəllimi kimi fəaliyyət göstərən xarici ölkə vətəndaşına qarşı sui-qəsd həyata keçirməyi tapşırması da təsbit edilib.

Dövlət Təhlükəsizliyi Xidməti tərəfindən keçirilmiş kompleks əməliyyat-istintaq tədbirləri nəticəsində Bəhruz Əskərovun tutularaq cinayət məsuliyyətinə cəlb edilməsi təmin edilib, məhkəmənin qərarı ilə barəsində həbs qətimkan tədbiri seçilib.