Taxıl biçininin yavaş-yavaş yekunlaşdığı dövrdə sahələrdə vəziyyət necədir? - Baku TV

Azərbaycanda taxıl biçini yekunlaşmaq üzrədir.

Kənd Təsərrüfatı Nazirliyinin sektor müdiri Şövqi Lələşov bildirib ki, iyulun 28-nə olan məlumata əsasən, taxıl sahələrinin 92,6 faizində biçin başa çatıb.

Onun sözlərinə görə, mövsüm ərzində 890 min hektara yaxın sahədə biçin aparılıb və 3 milyon 584 min tondan çox məhsul yığılıb:

"Hazırda buğda və arpa üzrə orta məhsuldarlıq 34,4 sentner/hektardır. Bu göstərici ötən ilin eyni dövrü ilə müqayisədə 1,6 sentner/hektar çoxdur".

Ş.Lələşov qeyd edib ki, buğda sahələrinin 88,7 faizində, arpa sahələrinin isə 96,1 faizində biçin yekunlaşıb. Orta məhsuldarlıq buğda üzrə 36,9 sentner/hektar, arpa üzrə isə 32,2 sentner/hektar təşkil edir. Artıq 22 rayonda taxıl biçini tam başa çatıb.

Nazirlik rəsmisinin sözlərinə görə, mövcud nəticələr ilkin proqnozlara uyğundur:

"Gözləntilərimiz özünü doğruldur. Son nəticə biçin tam yekunlaşdıqdan sonra məlum olacaq, lakin hazırkı məhsuldarlıq proqnozlaşdırılan göstəricilərə uyğundur".

Şövqi Lələşov işğaldan azad olunmuş ərazilərdə də taxıl biçininin plan üzrə davam etdiyini bildirib:

"Həmin ərazilərdə də məhsuldarlıq qənaətbəxşdir və proqnozlaşdırılan göstəricilər əldə olunur".