TƏBİB-dən Xəzərdə batan gəmidəki sərnişinlər barədə açıqlama

Fövqəladə Hallar Nazirliyinin "112" qaynar telefon xəttinə Bakı şəhəri, Səbail rayonu, Dənizkənarı Bulvar ərazisində dənizdə gəzinti qayığının çevrilməsi və gəmidəki şəxslərin köməksiz vəziyyətdə qalması barədə məlumat daxil olub.

FHN-dən bildirilib ki, məlumatla əlaqədar dərhal FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu hadisə yerinə cəlb edilib.

Əməliyyat şəraiti qiymətləndirilərkən gəzinti qayığının alt hissəsinin zədələnməsi və gövdəsinə su dolması nəticəsində 3-ü ekipaj üzvü, 3-ü sərnişin olmaqla 6 vətəndaşın təhlükəli vəziyyətdə qalması məlum olub.

Həyata keçirilən xilasetmə əməliyyatı nəticəsində vətəndaşlar xilas ediliblər.

TƏBİB-dən bildirilib ki, hadisə yerinə iki təcili tibbi yardım briqadası göndərilib. Hadisə nəticəsində dörd nəfər (cinsi qadın) zərər çəkib. Bir nəfərə yerində ilkin tibbi yardım olunub. Üç nəfər isə hipotermiya diaqnozu ilə Kliniki Tibbi Mərkəzə təxliyə olunub. Onlara zəruri tibbi xidmətlər göstərilib.