Valideyn himayəsindən məhrum uşaqlar üçün mühüm addım - Baku TV

Valideyn himayəsindən məhrum uşaqların ailə mühitinə qovuşması üçün daha bir addım atılıb. Himayədar ailə olmaq istəyən vətəndaşlar üçün proses sadələşdirilib.

Əmək və Əhalinin Sosial Müdafiəsi Nazirliyi tərəfindən himayədar ailə modelinin tətbiqi, valideyn himayəsindən məhrum uşaqların ailə mühitinə reinteqrasiya prosesinin təkmilləşdirilməsi və sadələşdirilməsi məqsədilə müvafiq prosedurlarda bir sıra dəyişikliklər edilib.

Yeni dəyişikliklər bu sahədə əlçatanlığın artırılmasına və xidmətlərin daha çevik təşkilinə imkan verir. Bununla yanaşı, himayədar ailə olmaq üçün müraciət edən vətəndaşların daha qısa müddətdə himayədar valideyn kimi fəaliyyətə başlaması nəzərdə tutulur.

Əmək və Əhalinin Sosial Müdafiəsi Nazirliyinin şöbə müdirinin müavini Nuranə Həsənova bildirib ki, himayədar ailə olmaq üçün müraciət edən şəxs uçota alındıqdan sonra 10 iş günü müddətində onunla müsahibə keçirilir. Eyni zamanda uşağın mənafeyinə uyğun olaraq ailənin maddi-məişət şəraiti yoxlanılır.

Onun sözlərinə görə, bu mərhələni uğurla keçən ailələr daha sonra Nazirlik tərəfindən təşkil olunan təlimlərə cəlb edilir. Yeni dəyişikliklərə əsasən, təlim müddəti minimum üç günədək azaldılıb.

Bundan əlavə, təlimlərdə iştirak edə bilməyən vətəndaşlar üçün onlayn iştirak imkanı yaradılıb. Bu dəyişiklik vətəndaş məmnunluğunun artırılmasına xidmət edir.

Nuranə Həsənova qeyd edib ki, himayədar ailə olmaq istəyən valideynin uşaq seçimində müəyyən edilmiş müddət də yeddi iş günündən beş iş gününədək azaldılıb.

“Himayədar ailə prosesinin mərhələlərinin – müsahibənin təşkili, maddi-məişət şəraitinin yoxlanılması, təlimin qiymətləndirilməsi, uşağın valideynə, valideynin uşağa uyğunluğu, eləcə də valideynlə uşağın görüşünün təşkili və himayədar ailə müqaviləsinin imzalanması mərhələlərinin yekun qiymətləndirilməsi üç iş günü müddətində həyata keçirilir”, – deyə o bildirib.