Ailənin sosial yardımı niyə kəsilib? - "Bacımın uşaqlarını himayəmə götürəndə..." - Baku TV

Baku TV-nin qaynar xəttinə müraciət edən Sevil Xəlilovanın sözlərinə görə, ailələri beş il əvvəl Özbəkistandan Azərbaycana köçüb. Həyat yoldaşı bacısının iki övladını da himayəsinə götürdükdən sonra ailə uzun müddət 8 nəfərlik tərkiblə ünvanlı dövlət sosial yardımı alıb. Lakin sosial yardımın müddəti 2025-ci ilin dekabrında başa çatdıqdan sonra yenidən müraciət etsələr də, müxtəlif səbəblərlə imtina cavabı alıblar.

Ailənin vəziyyətini daha da ağırlaşdıran məqam isə ailə başçısının hazırda xəstəxanada müalicə almasıdır.

Sevil Xəlilova bildirir ki, uşaqlardan biri autizm sindromundan əziyyət çəkir və xüsusi qayğıya ehtiyacı var:

"Sosial yardım alırdıq. Müddəti bitəndən sonra yenidən sənədlərimizi təqdim etdik. Bizə dedilər ki, sənədlərdə uyğunsuzluq var və müraciətimizə imtina verildi. Bacımın həyat yoldaşı vəfat edib, özü isə görmə problemi yaşayırdı. Buna görə də yoldaşımdan xahiş etdim ki, onun uşaqlarını himayəmizə götürək. Lazımi tibbi müayinələrdən keçdik. Lakin himayədarlıq sənədləri tam hazır olmadığı üçün yoxlama zamanı bildirdilər ki, uşaqları hələ rəsmi şəkildə himayəyə götürə bilmərik. Hazırda yoldaşım xəstəxanadadır, mən isə uşaqlarla birlikdə çox çətin vəziyyətdə qalmışam. Uşaqlardan biri autizmlidir, çox narahatdır".

Məsələ ilə bağlı Əmək və Əhalinin Sosial Müdafiəsi Nazirliyindən bildirilib ki, Bakı şəhəri Suraxanı rayon sakini Sevil Xəlilovanın ünvanlı dövlət sosial yardımı ilə bağlı 2024-cü ilin noyabrında etdiyi müraciət əsasında ailəyə 2025-ci il yanvarın 1-dən etibarən bir il müddətinə aylıq 759 manat 24 qəpik məbləğində sosial yardım təyin edilərək ödənilib.

Sosial yardımın müddəti başa çatdıqdan sonra ailə cari ilin fevral və mart aylarında yenidən elektron qaydada müraciət edib. Həmin müraciətlər elektron sistemdə aparılan yoxlamalar və maddi-məişət şəraitinin qiymətləndirilməsi nəticəsində qanunvericiliyin tələblərinə uyğun olaraq rədd edilib. İmtinalara səbəb abonent kodu məlumatlarında yanlışlıq və ailə tərkibinin düzgün göstərilməməsi olub.

Nazirliyin məlumatına görə, daha sonra müraciət edən şəxs əvvəllər himayəsinə götürdüyü iki uşağa artıq himayədarlıq etmədiyini bəyan edərək ailə tərkibini 6 nəfər göstərməklə yenidən müraciət edib. Son müraciət əsasında ailəyə 2026-cı il iyunun 1-dən etibarən bir il müddətinə aylıq 599 manat 40 qəpik məbləğində ünvanlı dövlət sosial yardımı təyin olunub.

Qurum qeyd edib ki, sonrakı dövrdə ailə tərkibində və ya digər əhəmiyyətli məlumatlarda hər hansı dəyişiklik baş verdiyi halda qanunvericiliyin tələblərinə uyğun olaraq bu barədə müvafiq qaydada məlumat verilməsi zəruridir.