Yanacaq istehlakı niyə artıb? - Səbəb avtomobil çoxluğudur, tıxac, yoxsa...? - Baku TV

Bu ilin yanvar-iyul aylarında Azərbaycanda pərakəndə ticarət şəbəkəsində istehlakçılara 2 milyard 327,3 milyon manatlıq avtomobil benzini və dizel yanacağı satılıb.

Dövlət Statistika Komitəsinin məlumatına görə, bu, ötən ilin eyni dövrü ilə müqayisədə 4,9 faiz çoxdur.

İqtisadçı ekspert Natiq Cəfərli yanacaq satışındakı artımın əsas səbəblərindən birinin yanacağın qiymətinin yüksəlməsi olduğunu bildirib.

“Statistikada göstərilən məsələ xərclənən pulun məbləğidir. Alınan yanacağın həcmi deyil. Yanvarın 1-dən dizel yanacağının və “Aİ-92” markalı benzinin qiyməti artdı. Məhz bu qiymət artımı ümumi xərclənən vəsaitin 5 faizə yaxın artmasına səbəb olub”, – deyə ekspert qeyd edib.

Natiq Cəfərli avtomobillərin sayının artmasının da yanacaq istehlakına təsir etdiyini vurğulayıb:

“Rəsmi statistika göstərir ki, hər il Azərbaycanda təqribən 60-70 min avtomobil yollara daxil olur. Avtomobil sayı artdıqca benzinə xərclənən vəsaitin həcmində də artım müşahidə edilir”.

Ekspert tıxacların yanacaq sərfiyyatını artırdığını da təsdiqləyib. Onun sözlərinə görə, xüsusilə yay aylarında kondisionerdən istifadə yanacaq sərfiyyatını daha da yüksəldir:

“Bəli, tıxaclarda yanacaq sərfiyyatı artır. Amma bunu qlobal və çox ciddi təsir göstərən amil hesab etmək olmaz. Əsas təsir edən amillər qiymət artımı və avtomobillərin sayının çoxalmasıdır”.