Yasamalda insanları ölümə sürükləyən quyu | Qurumdan açıqlama

Yasamal rayonu, Fəridə və Pərviz Abbasovlar küçəsində bir neçə ay öncə istismara yararsız xətlər yenilənərkən küçənin kənarında quyu qazılaraq siyirtmə quraşdırılıb.

Siyirtmə qoyularkən isə onun ətrafı bağlanmayıb.

Sakinlər deyirlər ki, siyirtmənin ətrafının bağlanmaması onlara daha çox gecə saatlarında çətin anlar yaşadır.

“Siyirtmənin ağzı açıq qalıb. Bu isə gecə vaxtı ərazidən keçən insanlar, nəqliyyat üçün təhlükəlidir. 2-3 gün bundan qabaq mən özüm az qala bura düşürdüm”, – sakin narazılığını ifadə edib.

Məsələ ilə bağlı “Azərsu”dan bildirilib ki, sözügedən ərazidəki quyu problemi yaxın günlərdə aradan qaldırılacaq.