YAŞAT Fondundan təhsilə qayğı

YAŞAT Fondunun səylə çalışdığı istiqamətlərdən biri də təhsildir.

Bunu YAŞAT Fondunun rəhbəri Elvin Hüseynov jurnalistlərə açıqlamasında deyib.

O bildirib ki, Fond bu istiqamətdə kifayət qədər işlər görür:

“Bu işlərin bir çoxunu Dövlət İmtahan Mərkəzi (DİM) ilə bərabər həyata keçiririk. Şəhid övladlarından 9-cu sinif buraxılış imtahanlarından ən yüksək nəticə göstərənləri yay məktəblərinə göndəririk. Bu, Almaniya, İngiltərədə həyata keçirilən yay məktəbləridir.

Eyni zamanda sözügedən layihə bu il beşinci dəfə idi reallaşıb. I sinifdən IV sinfə qədər bütün şəhid övladlarının – 1 467 nəfərin hər birinə birillik məktəb ləvazimatları tərəfimizdən təqdim olunub.

Eyni zamanda özəl təhsil müəssisələrində oxuyan şəhid övladlarının təhsil haqlarına dəstək göstərilir. Bu yaxınlarda ali təhsil müəssisələrinə ilk dəfə qəbul olan şəhid ailə üzvlərinin, müharibə əlillərinin hər birinə 2 000 manat birdəfəlik mükafat verilib. Təhsil istiqamətindəki layihələri bundan sonra da icra etməyə davam edəcəyik”.