Yaxşı maşının qiyməti elə olur ki... | Hansı maşınlar bahalaşdı?

Ölkəyə gətirilən minik avtomobillərinin qiyməti artıb.

Dövlət Gömrük Komitəsinin məlumatına görə, 2024-cü ilin avqust ayında idxal edilən bir minik avtomobilinin orta qiyməti 20 448 ABŞ dolları olub ki, bu da bir il əvvəllə müqayisədə 12 faiz çoxdur.

Bahalaşma benzin və dizellə işləyən maşınlarda olub. Onların qiyməti bu dövrdə 8 faizə yaxın artıb.

Belə ki, 2023-cü ilin avqust ayında ölkəyə gətirilən benzin və dizellə işləyən bir avtomobilin orta qiyməti 15 180 ABŞ dolları olduğu halda 2024-cü ilin həmin ayında bu göstərici 16 358 dollara yüksəlib.

Nəqliyyat eksperti Yasin Mustafayev bildirib ki, qiymət artımının əsas səbəbi ölkəyə gətirilən nəqliyyat vasitələrinin buraxılış ilinə görə qoyulan məhdudiyyətlə bağlıdır:

“Artıq buraxılış ili 10 ildən çox olan nəqliyyat vasitələrini ölkəyə gətirmək mümkün deyil”.

Bəs avtomobillərin idxalındakı qiymət artımı daxili bazara necə təsir edib?

Avtomobil alverçisi Eldar Əliyevin sözlərinə görə, yaxşı maşının qiyməti yüksək olur:

“Alıcı pis maşını 5000-dən aşağı qiymətə almaqdansa, 3000-5000 əlavə pul ödəyib, yaxşı keyfiyyətli avtomobil alır”. Bir sözlə, istər ölkəyə idxalda, istərsə də daxili bazarda qiymətlər avtomobilin buraxılış ili və texniki vəziyyətindən asılı olaraq artmaqdadır.