Yevlaxda qəribə toy | Gəlin toya görün niyə onlayn qoşuldu | "Dedim ki, sonra taparsan..." - Baku TV

Azərbaycanda maraqlı və qeyri-adi toy keçirilib.

Yevlax rayonunun Qoyunbinəsi kəndində baş tutan toyda gəlin iştirak etməyib, lakin canlı bağlantı vasitəsilə toyu izləyib. Ailənin bildirdiyinə görə, bu qərar qarşılıqlı razılıq əsasında verilib.

Bəyin atası məsələ ilə bağlı açıqlamasında bildirib ki, təxminən 5-6 ay əvvəl oğluna toy etməyi təklif edib.

"Göstərdiyim qızlara baxırdı, deyirdi ki, yaşı uyğun deyil, balacadır. Dedim, gəl toyu edək, qızı sonra taparsan. Bir müddət sonra gəlib dedi ki, ata, sən haqlısan, gəl toyu edək, qızı sonra taparam. Bir həftənin içində hər şey həll olundu və toy etdik. Qız Tailanddandır. Dedim, Allah xoşbəxt etsin. Mənim üçün insan insandır, hansı ölkədən olmasının fərqi yoxdur", – deyə bəyin atası qeyd edib.

Bəyin anası isə "oğlum bir ildir Tailandda yaşayan həmin qızla danışırdı. Onun xətrinə ingilis dilini öyrəndi. Qız universitetdə təhsil aldığı üçün ona gəlməyə icazə vermədilər. Buna görə də toy burada oldu, oğlum isə sonradan yenidən onun yanına getdi. Gəlini telefon vasitəsilə görmüşəm, Azərbaycan dilində xeyli söz bilir. Bizə "ana", "ata" deyir", – deyə bildirib.