22 ölkədən 68 məktəbli Arktikada

22 ölkədən 68 məktəblinin qatıldığı VII Beynəlxalq Arktika Ekspedisiyası başa çatıb.

“Bilik buzqıranı” layihəsi çərçivəsində təşkil olunan səfərin iştirakçıları Şimal qütbünə çataraq Arktikanın sərt təbiəti ilə tanış olub, elmi araşdırmalarda iştirak ediblər.

“Rosatom” dövlət korporasiyasının dəstəyi ilə keçirilən ekspedisiya avqustun 4-dən 13-dək davam edib. Məktəblilər səfər zamanı “50 il Qələbə” adlı atom buzqıran gəmisinin imkanları ilə yaxından tanış olublar.

Səfər iştirakçıları üçün Arktikaya səyahət həm də fərqli ölkələrdən olan yaşıdları ilə tanış olmaq və yeni təcrübə qazanmaq imkanı yaradıb.

Ekspedisiya çərçivəsində Arktikada elmi təcrübələr də aparılıb. Uzaq və çətin keçilən ərazilərdə rabitənin təmin olunması üçün radiomayak işə salınıb. Toplanan məlumatların ekoloji monitorinq, buz şəraitinin izlənməsi və Arktikada gəmiçiliyin təhlükəsizliyinin təmin olunması üçün istifadə ediləcəyi bildirilib.

Bu ekspedisiya həm də tarixi hadisə ilə yadda qalıb. “Rosatom”un məlumatına görə, bu səfər səthüstü gəminin Şimal qütbünə sayca 200-cü ekspedisiyası olub.