ABŞ-dən illər sonra kosmik sahədə yenilik

Amerika Birləşmiş Ştatlarının “Odysseus” kosmik gəmisi Ay səthinə uğurla eniş edib.

Bununla da NASA 52 ildən sonra ilk dəfə Aya kosmik gəmi göndərib. “Intuitive Machines” şirkətinin “IM-1” missiyası çərçivəsində NASA-nın elmi və texnoloji yüklərini daşıyan kosmik gəmi “SpaceX” şirkətinin istehsal etdiyi “Falcon” raketi ilə kosmosa göndərilib.

Şirkətin uçuş üzrə direktoru Tim Krainin sözlərinə görə, təxminən 15 dəqiqə sonra kosmik gəmidən ilk siqnal alınıb.

“Əminik ki, avadanlıqlarımız Ay səthindədir və gəmi ilə əlaqə yaratmışıq”, – deyə o bildirib.

Qeyd edək ki, kosmik gəmidəki cihazlar vasitəsilə Ay səthində araşdırmalar aparılacaq. “Odysseus”la həmçinin “Star Trek” filminin yaradıcısı Cin Roddenber və ailə üzvləri, o cümlədən filmdə rol alan Nişel Nikolz, Ceyms Duhen və Deforest Kellinin qalıqları Aya göndərilib.

Kosmik gəmidə ABŞ-nin keçmiş prezidentləri Corc Vaşinqton, Duayt Eyzenhauer və Con Kennedinin də DNT-ləri var. Onu da vurğulayaq ki, “Odysseus” Aya enən ilk şəxsi kosmik gəmi olaraq qeydə alınıb.