ABŞ-İran danışıqları İslamabadda keçiriləcək? - Baku TV

Pakistan, Türkiyə, Misir və Səudiyyə Ərəbistanının xarici işlər nazirləri ABŞ-İran münaqişəsinin həlli yollarını müzakirə ediblər.

Bu barədə Pakistanın xarici işlər naziri Məhəmməd İshaq Dar İslamabadda keçirilən danışıqların yekununa əsasən açıqlayıb.

"Biz regionda müharibəyə tezliklə və birdəfəlik son qoymaq yollarını müzakirə etdik", – deyə o bildirib.

Onun sözlərinə görə, tərəflər münaqişənin heç bir tərəfin maraqlarına uyğun olmadığı barədə razılığa gəliblər.

"Bu müharibə heç kimə faydalı deyil, yalnız itkilərə və dağıntılara səbəb olacaq", – deyə İshaq Dar vurğulayıb.

Nazir həmçinin ABŞ və İran arasında münaqişənin tənzimlənməsi ilə bağlı danışıqların yaxın günlərdə Pakistanın paytaxtı İslamabadda keçirilməsinin gözlənildiyini bildirib. Onun sözlərinə görə, Pakistan hər iki tərəf arasında məzmunlu danışıqlara ev sahibliyi etməyə və prosesə dəstək göstərməyə hazırdır.

İshaq Dar qeyd edib ki, həm İran, həm də ABŞ danışıqların təşkili məsələsində Pakistana etimad göstərib.