Ceyhun Bayramov Pakistanın XİN rəhbəri ilə nələri müzakirə etdi? - Baku TV

Pakistanın paytaxtı İslamabadda partlayış olub. Hadisə nəticəsində xəsarətalanlar var. Ən azı 31 nəfərin öldüyü bildirilir, 169 nəfər isə yaralanıb.

Axtarış-xilasetmə əməliyyatlarının davam etdirildiyi deyilir. Məsciddəki partlayış cümə namazı zamanı baş verib.

Hadisə ilə əlaqədar olaraq Azərbaycan xarici işlər naziri Ceyhun Bayramov Pakistanın Baş nazirinin müavini və xarici işlər naziri Məhəmməd İshaq Dara zəng edib. Nazir Azərbaycan Prezidenti, hökuməti və xalqı adından İslamabadda baş vermiş partlayışla əlaqədar başsağlığı verib, həlak olanların ailələrinə başsağlığı diləyib və Pakistanla həmrəy olduqlarını ifadə edib.

Hücumu qətiyyətlə pisləyən Pakistanın Baş nazirinin müavini və xarici işlər naziri ölkəsinin terrorizm bəlasına qarşı mübarizədə əzmkar mövqeyini bir daha vurğulayıb.

Telefon danışığı zamanı tərəflər həmçinin qarşılıqlı maraq doğuran regional və beynəlxalq məsələlər ətrafında fikir mübadiləsi aparıb, Pakistan və Azərbaycan arasında mövcud olan möhkəm və davamlı tərəfdaşlığın bir daha təsdiqləndiyini qeyd ediblər.