ABŞ müharibəyə 40 milyarddan çox xərc çəkib

Yaxın Şərqdə davam edən genişmiqyaslı hərbi münaqişə qlobal iqtisadiyyatla yanaşı, ABŞ-nin hərbi büdcəsinə də ağır zərbə vurur. Baku TV-nin "Dünya" xidmətinin verdiyi məlumata görə, ABŞ-nin İrana qarşı həyata keçirdiyi hərbi əməliyyatların ümumi dəyəri artıq 42 milyard dolları keçib; 6 aprel 2026-cı il tarixinə olan son hesablamalara əsasən, təxminən 37 gün davam edən aktiv döyüş əməliyyatları ərzində Vaşinqton 42,1 milyard dollardan çox vəsait xərcləyib. "Iran War Cost Tracker" portalının real vaxt rejimində apardığı hesablamalar Pentaqonun ABŞ Konqresinə təqdim etdiyi rəsmi hesabatlara əsaslanır. Donald Tramp administrasiyasının rəhbərliyi ilə həyata keçirilən bu əməliyyatların ilk altı günü ərzində xərclər 11,3 milyard dollar təşkil etmişdisə, hazırda gündəlik xərclərin təxminən 1 milyard dollar civarında olduğu bildirilir. Donald Trampın regional hərbi eskalasiya siyasəti və "Epic Rage" (bəzi mənbələrdə "Epic Fury") əməliyyatı çərçivəsində istifadə olunan döyüş sursatları, təyyarədaşıyan qrupların istismarı və logistik təminat ABŞ vergi ödəyiciləri üçün rekord xərclərə səbəb olur.

Məlumata əsasən, müharibənin hər saatı Vaşinqtona təxminən 9,16 milyon dollara başa gəlir. Videoda ABŞ-nin bölgədəki hərbi aktivliyi, Donald Trampın regional hərbi eskalasiya siyasəti fonunda artan maliyyə yükləri və İrandakı hərbi hədəflərə endirilən zərbələrin iqtisadi miqyası əks olunub. Reportajda vurğulanır ki, bu xərclər gələcəkdə ABŞ-nin daxili büdcə siyasətində ciddi dəyişikliklərə yol aça bilər.