Akopyanın Çindəki geyimi gündəmə necə düşdü?

“Şanxay Əməkdaşlıq Təşkilatının sammitində Ermənistanın Baş naziri Nikol Paşinyanın həyat yoldaşı Anna Akopyanın geyimində müəyyən dres-kod qaydaları nəzərə alınmamışdı”.

Bu barədə özünün “Instagram” səhifəsində etiket üzrə ekspert İrina Yarovaya yazıb.

“Tsipao Çinin milli geyimidir. Sammit iştirakçılarının nümayəndə heyətlərinin qarşılanmasında Akopyan bu geyimdə olub. Bu, həm yaxşı seçim sayılır, həm də pis nümunədir”, – deyə Yarovaya qeyd edib.

Onun sözlərinə görə, Anna Akopyan və komandası Çin üçün vacib olan mədəni, rəng və rəmzi elementləri araşdırıb.

“Milli geyimin seçilməsi də Çinə hörmət əlamətidir. Həmin geyim xarici görkəmlə yanaşı, mədəni dialoqdur. Lakin pozitiv məqamlar bununla bitir. Milli geyimdən istifadə bəzən mədəni özününküləşdirmə streotipidir. Belə çıxır ki, Anna Akopyan Hindistana getsə, sari geyinəcək”, – deyə etiket eksperti tənqidini davam etdirib.

İrina Yarovaya bildirib ki, bunun əvəzinə Anna Akopyan normal geyimə Çinə aid hansısa naxış, aksesuarları əlavə edə bilərdi. Qolların, ayaqların açıqda olması, qoltuğun görünməsi rəsmi tədbirlərdə arzuolunmaz haldır.

“Sin Cinpinin həyat yoldaşı Pen Liyuanın qarderobunda tsipao var. Amma siz onun geyimində Anna Akopyanda olan çılpaqlıqları görə bilməzsiniz. Çünki o, ya çiyinlərini yaxşı örtür, ya da paltarın dirsəyi örtən növünü geyinir. Anna Akopyan isə paltarın bədən oturması ilə yanaşı, rəngi də düzgün seçməmişdi”, – deyən ekspert bildirib ki, birinci xanımların geyimləri onun özünüifadə yox, təmsilçiliyinin görüntüsü olmalıdır. Yəni belə rəsmi tədbirlərdə hər kəs öz dövləti haqqında təəssürat yaradır.