Almaniyadan gözlənilməz addım | 1,35 milyard avro nəyə xərclənəcək?

Almaniya Müdafiə Nazirliyi NATO-nun Şərq cinahına hərbi qüvvələrin operativ daşınmasını təmin etmək məqsədilə Bremerhaven limanında nəhəng logistika qovşağının qurulmasına dair niyyət protokolu imzalayıb.

Almaniya Müdafiə Nazirliyinin məlumatında layihə çərçivəsində Bundesver və NATO müttəfiqlərinin texnika və şəxsi heyətinin Şərqi Avropaya operativ köçürülməsini təmin etmək üçün limanın və regional nəqliyyat şəbəkəsinin infrastrukturunun yenidən qurulacağı bildirilib.

Almaniyanın müdafiə naziri Boris Pistorius, Bremen meriyası və limanın operatoru olan şirkətin rəhbərliyi tərəfindən imzalanan sənədə əsasən, Müdafiə Nazirliyi bu məqsədlə 1,35 milyard avroya qədər vəsait ayıracaq. Bu, Bremen əyalətinin tarixində hərbi büdcədən ayrılan ən böyük maliyyə vəsaitidir.

Nazir Boris Pistorius kəskinləşən təhlükəsizlik mühitində zirehli texnikanın, yanacağın və minlərlə hərbçinin qısa müddətdə NATO-nun Şərq cinahına yerləşdirilməsi qabiliyyətinin Alyansın çəkindirmə və müdafiə gücü üçün həlledici əhəmiyyət kəsb etdiyini bildirib.