Avropa Rusiyaya görə qorxuya düşdü | Volodindən Ağ Evə xəbərdarlıq

“Vaşinqton Rusiyanın aktivləri ilə bağlı qanunsuz qərar qəbul edərək onların oğurlanmasına yol verib”.

Bunu Rusiya Dövlət Dumasının spikeri Vyaçeslav Volodin deyib.

Bildirib ki, belə bir qərar presedent yaradaraq beynəlxalq hüquqa düzəlməz ziyan vuracaq:

“Vaşinqton oğurluq edərək açıq şəkildə qeyri-qanuni qərar verdi. Bu, şübhəsiz ki, digər dövlətlərin, bizneslərin və özəl investorların ABŞ-yə olan inamını sarsıdacaq, bütün qlobal maliyyə sisteminin əsaslandığı mülkiyyət toxunulmazlığı prinsipini məhv edəcək. İstənilən dövlətin də bunu etmək hüququ olacaq.

Ölkəmizin indi xarici aktivlərlə bağlı simmetrik qərarlar qəbul etmək üçün bütün əsasları var. ABŞ Rusiyanın aktivlərinin müsadirəsi haqqında qanun qəbul etməklə Avropa İttifaqını da eyni addımı atmağa təhrik etmək niyyətindədir, bu, Avropa iqtisadiyyatı üçün dağıdıcı olacaq”.

Avropa rəsmiləri isə həm investorların Avropaya inamının azalacağından, eləcə də Moskvadan cavab tədbirləri görüləcəyindən ehtiyat edərək Rusiyanın aktivlərini müsadirə etməkdən çəkinirlər. Bu barədə “Vaşinqton Post” məlumat yayıb.

Qeyd olunub ki, qoca qitə ABŞ-nin riskli hesab etdiyi hərəkətlərdə israr etməsindən narazıdır, çünki Rusiya aktivlərinin əksəriyyəti Avropadadır və Rusiyanın cavab tədbirləri ilk növbədə ona təsir edəcək.