Avtomobil almaq daha da baha başa gələcək | Yeni qərarın detalları - Baku TV

Gürcüstanın Daxili İşlər Nazirliyinin Xidmətlər Agentliyinin bəzi xidmətləri üzrə yeni rüsumlar tətbiq olunacaq.

Bununla bağlı qanun layihəsi hazırlanıb.

Sənədə əsasən, Gürcüstanda xarici ölkə vətəndaşlarının alacağı və yaxud təkrar ixrac edəcəyi nəqliyyat vasitələri ilə bağlı rüsumlar artırılacaq.

Tranzit nömrənin verilməsinə görə 50 lari, yəni 32 manat həcmindəki hazırkı rüsum 370 lariyə, yəni 233 manata qədər qaldırılacaq. Gürcüstanda alınan və yaxud təkrar ixrac üçün nəzərdə tutulan bir nəqliyyat vasitəsi üçün müvafiq ekspertiza aktının tərtib olunmasına görə isə rüsum 100 laridən 180 lariyə, yəni 63 manatdan 113 manata qaldırılır.

İxrac və ya təkrar ixrac üçün nəzərdə tutulan nəqliyyat vasitəsi üçün agentlik tərəfindən gömrük bəyannaməsinin və yaxud qeydiyyat şəhadətnaməsinin doldurulması üçün rüsum isə 130 laridən 200 lariyədək, yəni 82 manatdan 126 manata artırılacaq.

Qeyd edək ki, bu ilin yanvar-oktyabr aylarında Gürcüstandan Azərbaycana 181 milyon dollar dəyərində 6771 ədəd minik avtomobili ixrac olunub.