Baş nazirdən Mirzoyana sərt sözlər | Öz işinizlə məşğul olun!

Ermənistan hökuməti Baş nazir Nikol Paşinyanın rəhbərliyi ilə növbəti dəfə toplanıb.

İclasda ölkədə heyvandarlığın inkişaf etdirilməsi məsələsinin müzakirəsi zamanı xarici işlər naziri Ararat Mirzoyan da təkliflə çıxış edib.

Baş diplomatın lazımi heyvan növlərinin alınıb, sonra isə yarı qiymətə kəndliyə satılması ilə bağlı irəli sürdüyü təklifinə N.Paşinyan gülərək cavab verib.

Baş nazir çıxışında həmçinin ölkədəki heyvandarlığın səviyyəsindən də şikayət edib:

"Cənab A.Mirzoyan, bəs dövlət o qədər heyvanı alıb, harada saxlayacaq? Bu nə vaxta qədər davam edəcək? Onların yarısı öləcək. Yəni dövlət bir həftəlik də olsa, heyvandarlıqla məşğul olmalıdır. Bunu kim edəcək? Xarici İşlər Nazirliyi bizi əmin edir ki, heyvandarlıqla məşğul olacaq? Yox, siz öz işinizdə daha yaxşısınız. Buna görə də yaxşı olar ki, öz işinizlə məşğul olun.

Heyvandarlığa gəldikdə isə deyə bilərəm ki, qoyunçuluq ən gəlirli sahələrdəndir. Lakin araşdırmalar göstərir ki, insanlar qoyunu xaricdən alırlar. Mən kəndlərin birində idim, oradakılar etiraf etdilər ki, quzu ixracı ən gəlirli sahələrdəndir. Amma sürünün artmamasının səbəbini soruşanda mənim üçün gözlənilməz olan bir cavab eşitdim. Dedilər ki, çoban problemi var. Çoban tapa bilmirlər”.

Məlumat üçün bildirək ki, Ermənistanın Baş naziri Nikol Paşinyan avqustun 22-də Ararat bölgəsinə səfər edib. O, səfəri zamanı Lusaratda qəfil dayanıb və kənd sakinləri ilə problemləri və onların həlli yollarını müzakirə edib.