Baydendən məhkəmənin qərarına təəccübləndirən reaksiya | ABŞ-də ilkdir ki...

İyunun 11-də ABŞ-nin Delaver ştatında ölkə prezidenti Cozef Baydenin oğlu Hanter Baydenin məhkəməsi keçirilib.

Münsiflər heyəti Hanter Baydeni ona qarşı irəli sürülən hər üç ittihamda təqsirli bilib.

Qeyd edək ki, ittihamlara əsasən, o, 2018-ci ildə odlu silah alarkən federal lisenziyalı silah satıcısına yalan danışmaqda, narkotik vasitələrin aludəçisi olmadığını göstərən saxta sənəd təqdim etməkdə və 11 gün ərzində qanunsuz olaraq odlu silaha sahib olmaqda təqsirli bilinir.

Bundan əlavə, sentyabrda baş tutacaq növbəti məhkəmədə ona qarşı 1,4 milyon dollar həcmində vergidən yayınma ittihamı da irəli sürülüb. Ağ Ev rəhbəri isə oğlu ilə bağlı qəbul edilən qərara pozitiv yanaşıb. “Mən prezident olmaqla yanaşı, həm də atayam. Biz oğlumuzu sevirik və onunla fəxr edirik. Daha əvvəl də dediyim kimi, bu prosesin nəticəsini qəbul edəcəyəm və məhkəmənin qərarına hörmət göstərəcəyəm. Mən və həyat yoldaşım hər zaman oğlumuzu dəstəkləməyə və onun yanında olmağa davam edəcəyik”, – deyə o bildirib.