Bizim məqsədimiz ancaq bunlardır… | Rusiya Müdafiə Nazirliyi məlumat yaydı
Rusiyanın müdafiə naziri Andrey Belousov Belqorod, Bryansk və Kursk vilayətlərinin təhlükəsizliyinin təmin edilməsi məsələlərinə dair iclas keçirib.
Nazir bildirib ki, sözügedən ərazilərin müdafiəsi üzrə Koordinasiya Şurası yaradılıb.
Onun sözlərinə görə, burada məqsəd dövlət sərhədini əhatə edən qoşunların təminatının səmərəliliyini artırmaqdır.
“Söhbət ilk növbədə digər hüquq-mühafizə orqanları və Belqorod vilayətinin administrasiyası ilə qarşılıqlı əlaqədə qoşunların komandanlıq və idarəetmə sisteminin səmərəliliyinin artırılmasından, məsul vəzifəli şəxslərin müəyyən edilməsindən, əsas vəzifələri yerinə yetirmək üçün əlavə qüvvə və vasitələrin ayrılmasından gedir.
Bizim məqsədimiz dövlət sərhədinin mühafizəsi, əhalinin təhlükəsizliyi vəzifələrini həll edən qoşun qruplarına hərtərəfli dəstəyi artırmaqdır. Koordinasiya Şurası tələb olunan silah, hərbi və xüsusi texnika ilə hərbçiləri təmin edəcək, dövlət sərhədlərində təhlükə artdığı zaman qoşunların yığılmasını, təhlükənin aradan qaldırılmasını həyata keçirəcək”, – deyə A.Belousov qeyd edib.
Xatırladaq ki, avqustun 6-da Ukrayna Silahlı Qüvvələrinin bölmələri Kursk vilayətinin sərhəd rayonlarına hücum edib. Bu səbəbdən də Kursk və Belqorod vilayətlərinin bir sıra sərhədyanı rayonlarında insanların təxliyəsinə başlanılıb. Avqustun 15-də isə Belqorod vilayətində federal fövqəladə vəziyyət rejimi tətbiq edilib.
![icon](/images/loading.png)