Çin Rusiyanın oyuncağına çevrilib... | Zelenskidən qalmaqallı açıqlama
Ukrayna Prezidenti Volodimir Zelenski Çini Rusiyaya kömək etməkdə günahlandırıb.
O, Sinqapurda keçirilən “Şanqri-La Dialoqu” forumunda çıxışı zamanı bir sıra ölkələrin İsveçrədə keçiriləcək sülh sammitinin baş tutmasının əleyhinə olduğunu və qarşısını almağa çalışdıqlarını iddia edib:
“Biz bəzi dünya liderlərinin hələ də sülh sammitində iştirakını təsdiqləməməsindən məyusuq. Təəssüf ki, sammiti pozmaq cəhdləri də var. Biz inanmaq istəmirik ki, bütün bunlar yalnız güc sahibi olmaq və qlobal bir dünyanın varlığından imtina edərək sözügedən gücü 1 və ya 2 ölkənin əlində cəmləməsinə şərait yaratmaq cəhdləridir.
Bəli, əlbəttə ki, biz Çinin mesajını almışıq. Hansı ki, onlar açıq şəkildə bildirdilər ki, sülh sammitində iştirak etməyəcəklər. Rusiya Çinin regiona təsirindən istifadə edərək, ölkənin diplomatlarının da başını qataraq sülh sammitini pozmaq üçün əlindən gələn hər şeyi edir. Təəssüf ki, Çin kimi böyük və güclü bir dövlət Rusiyanın əlaltı oyuncağına çevrilib”.
Ukraynalı lider çıxışında həmçinin Çin Sədri Si Cinpinin 1 il əvvəl telefon danışığı zamanı ona müharibəyə müdaxilə etməyəcəyinə, Rusiyaya silah-sursat verməyəcəyinə dair söz verdiyini də açıqlayıb.
V.Zelenskinin sözlərinə görə, çinli həmkarı sözünün üstündə durmayıb. Bildirib ki, hazırda Rusiya bazarlarına bəzi avadanlıqlar Çin vasitəsilə gəlir. Ukrayna Prezidentinin sözügedən açıqlamasına isə Pekindən cavab gecikməyib.
Ölkənin müdafiə naziri Don Cün V.Zelenskinin iddialarını təkzib edib.
“Çin heç bir tərəfə silah verməyib və sözügedən tərəflərin istifadə etdiyi malların ixracına ciddi nəzarət edir. Biz regionda sülh və dialoqun tərəfdarıyıq”, – deyə o əlavə edib.
Volodimir Zelenski çıxışında həmçinin Çin rəsmiləri ilə görüşə bilməməsindən də gileylənərək Kiyevlə zəif əlaqələrin olmasına görə rəsmi Pekini günahlandırıb. Qeyd edib ki, 2024-cü il üzrə keçirilən beynəlxalq forum da daxil olmaqla, uzun müddətdir ki, Ukrayna Çin rəsmiləri ilə görüşməyə can atır. Lakin Kiyevə hər dəfə rədd cavabı verilir.
![icon](/images/loading.png)