Danışıqlarda iştirak edəcək nümayəndə heyətinin tərkibi açıqlandı

Ukrayna Prezidenti Volodimir Zelenski ABŞ, Rusiya və Ukrayna nümayəndələrinin iştirakı ilə Birləşmiş Ərəb Əmirliklərində (BƏƏ) texniki səviyyədə keçiriləcək üçtərəfli danışıqlarda ölkəsinin nümayəndə heyətinin tərkibini açıqlayıb.

Zelenski bu barədə Davosda keçirilən Dünya İqtisadi Forumu çərçivəsində jurnalistlərə açıqlamasında bildirib.

Onun sözlərinə görə, Ukrayna tərəfini danışıqlarda Milli Təhlükəsizlik və Müdafiə Şurasının katibi Rustem Umerov, Prezident Aparatının rəhbəri Kirill Budanov, Prezident Aparatı rəhbərinin birinci müavini Sergey Kislitsa, hakim “Xalqın Xidmətçisi” partiyasının parlament fraksiyasının rəhbəri David Araxamiya və Ukrayna Silahlı Qüvvələrinin Baş Qərargah rəisi Andrey Qnatov təmsil edəcək.

Zelenski qeyd edib ki, bu formatda keçiriləcək görüş Ukrayna, ABŞ və Rusiya arasında ilk üçtərəfli danışıqlar olacaq və görüşün 23-24 yanvar tarixlərində baş tutması planlaşdırılır.

Ukrayna Prezidenti eyni zamanda müharibənin dayandırılması perspektivlərinə də toxunub. Zelenski ABŞ Prezidenti Donald Trampın Rusiya lideri Vladimir Putinlə bərabər səviyyədə dialoq apara bildiyini və bunun Ukraynadakı müharibənin başa çatdırılmasına imkan yarada biləcəyini bildirib.

“Müharibəni davam etdirib-etdirməmək onların qərarıdır. Biz isə onu dayandırmaq istəyirik. Düşünürəm ki, Prezident Tramp bunu, həqiqətən, edə bilər, çünki o, Putinlə bərabər səviyyədə danışır. Bunu hər kəs bacarmır”, – deyə Zelenski vurğulayıb.

O qeyd edib ki, ABŞ hərbi və siyasi baxımdan Rusiyadan xeyli güclüdür və tərəflər kompromislər axtarışındadır.

“Biz müxtəlif addımlara açığıq və bu, iki tərəfin kompromisləri deməkdir. Ruslar bu müharibədə qalib gəlməyəcəklər”, – deyə Ukrayna Prezidenti sözlərinə əlavə edib.