Dünya böhranından faydalanan milyarderlər sərvətlərinə sərvət qatır

Dünyanın ən varlı beş adamı son illərdə xeyli zənginləşib.

Bu barədə Britaniya mərkəzli “Oxfam” mərkəzinin açıqladığı illik bərabərsizlik hesabatında qeyd olunub.

Bildirilir ki, 2020-ci ildən bəri bu milyarderlərin xalis sərvəti inflyasiya nəzərə alınmaqla 114% artaraq 869 milyard dollara çatıb. Mövcud tendensiyalar davam edərsə, dünya yaxın onillikdə özünün ilk trilyonerini görə bilər.

Eyni zamanda, qlobal miqyasda 5 milyarda yaxın insan inflyasiya, müharibə və iqlim böhranı ilə mübarizə apararaq yoxsullaşıb. Mövcud trayektoriyaya əsasən, yoxsulluğu aradan qaldırmaq üçün təxminən 230 il vaxt lazımdır.

“Tesla” və “SpaceX” də daxil olmaqla bir neçə şirkəti idarə edən İlon Mask son illərdə ən çox qazananlardan olub. Onun sərvəti 2020-ci ilin martından 737% artaraq noyabrın sonunda 245,5 milyard dollara çatıb.

Fransız lüks mallar nəhəngi LVMH-in sədri Bernar Arno və ailəsinin sərvəti 111% artaraq 191,3 milyard dollar olub.

“Amazon”un qurucusu Ceff Bezosun sərvəti 24% artaraq 167,4 milyard dollar olub.

“Oracle”ın qurucusu Lari Elisonun sərvəti 107% artaraq 145,5 milyard dollar təşkil edir.

“Berkshire Hathaway” şirkətinin CEO-su Uorren Baffet sərvəti 48% artaraq 119,2 milyard dollara çatıb.

“Oxfam”ın məlumatına görə, bütövlükdə, milyarderlərin sərvəti 2020-ci ildən bəri 3,3 trilyon dollar və ya 34% artıb və sərvətləri inflyasiya tempindən 3 dəfə daha sürətlə genişlənib.