Dünya ölkələrindən Azərbaycana Müstəqillik Günü ilə bağlı təbrik paylaşımları

Türkiyə Xarici İşlər Nazirliyi Azərbaycan xalqını 28 May – Müstəqillik Günü münasibətilə təbrik edib. Bu barədə qurumun rəsmi “X” hesabında paylaşım edilib.

“Əziz Azərbaycan, Müstəqillik Gününüz mübarək! Xoşbəxtliyi xoşbəxtliyimiz, kədəri kədərimiz olan azərbaycanlı qardaşlarımızın qürurunu və coşqusunu ürəkdən bölüşürük”, – deyə paylaşımda vurğulanıb.

Türkiyənin Azərbaycandakı səfiri Cahit Bağçı da rəsmi “X” hesabındakı paylaşımında Azərbaycanın müstəqilliyinin 106-cı ildönümünün qeyd olunduğunu bildirərək dövlətimizə və xalqımıza daim sülh, rifah və tərəqqi arzu edib.

Türkiyənin “Baykar” şirkətinin texniki direktoru Selçuk Bayraktar rəsmi sosial media hesabındakı paylaşımında “Bir dəfə yüksələn bayraq bir daha enməz. Qardaş ölkəmiz Azərbaycanın Müstəqillik Günü mübarək, birliyimiz və həmrəyliyimiz əbədi olsun!”, – deyə təbriklərini çatdırıb.

Okeanın o tayından da Azərbaycana təbrik mesajı gəlib. ABŞ dövlət katibi Entoni Blinkenin bəyanatında bildirilir ki, son 32 ildə təhlükəsizlik və enerji sahəsindəki əməkdaşlıq üzərində tərəfdaşlıq qurulan Azərbaycanla əlaqələr yüksək qiymətləndirlir.

“ABŞ Ermənistan və Azərbaycan arasında davamlı və ləyaqətli sülhün əldə edilməsi istiqamətində görülən işləri alqışlayır. Biz bu səyləri dəstəkləməyə, uzun müddətdir davam edən münaqişədən sonra yeni səhifəni açmaq və daha yaxşı gələcək qurmaq üçün hazırıq. Azərbaycanın müstəqilliyi şərəfinə bu mühüm bayramda mən ABŞ-nin Azərbaycanın müstəqilliyinə, ərazi bütövlüyünə və suverenliyinə dəstəyini bir daha təsdiqləyirəm”, – deyə bəyanatda vurğulanır.

Fransanın Azərbaycandakı səfiri Ann Buayon isə “X” hesabındakı təbrik paylaşımında Azərbaycana sülh və firavanlıq dolu gələcək arzulayıb.

Bununla yanaşı, Rumınıya, Qazaxıstan, Pakistan, Polşa səfirliyi də ölkəmizi 28 May – Müstəqillik Günü münasibətilə təbrik edərək sülh, firavanlıq və ən xoş arzularını çatdırıb.