Ermənistan OPEC-dən borc alır

Ermənistan OPEC-dən 50 milyon avro borc alacaq.

Bunu ölkənin maliyyə nazirinin müavini Eduard Akopyan yerli mediaya açıqlamasında deyib.

Bildirilib ki, bu, ətraf mühitin yaxşılaşdırılması üçün lazımdır. Nazirin sözlərinə görə, borcun qaytarılma müddəti 20 ildir, lakin əsas borcun ödənilməsinə 2028-ci ildən başlanılacaq.

Məlumat üçün bildirək ki, 2023-cü ilin sentyabrın 1-nə olan məlumata görə, Ermənistanın dövlət borcu 11 milyard 395 milyon dollar təşkil edib.

Erməni mediasının xəbərinə görə, bu, ötən ilin müvafiq dövrü ilə müqayisədə 9, 2022-ci il dekabrın 21-i ilə müqayisədə isə 5,4 faiz çoxdur. Hökumətin borcu isə 10 milyard 844,1 milyon dollar olub.

Xarici borcun 91 faizi Ermənistan hökumətinin, 9 faizi isə Mərkəzi Bankın borcudur. Xarici və hökumət kreditlərinin ən böyük hissəsi Dünya Bankının payına düşür. Ermənistanın ikinci ən böyük kreditoru 18,8 faizlə Asiya İnkişaf Bankıdır.