Ermənistanın Rusiyaya düşmənçiliyi başladı?

Ermənistanın Baş naziri Nikol Paşinyanın yeni konstitusiya ilə bağlı səsləndirdiyi fikirləri ətrafında gedən söhbətlər səngimək bilmir. Ölkə mediasında sözügedən məsələ ilə bağlı yeni məlumatlar dərc edilib.

Xəbərə görə, N.Paşinyan hökuməti konstitusiyaya tərəfsizlik müddəasını əlavə etmək niyyətindədir ki, bu müddəaya görə, Ermənistan ərazisində xarici ölkələrin silahlı qüvvələrinin daimi əsaslarla yerləşdirilməsi qadağan edilir.

Qeyd olunub ki, sözügedən əlavə birbaşa Rusiya hərbi bazalarına və sərhəd qoşunlarına qarşı yönəlib. Bir sözlə, əgər Ermənistan Konstitusiyasına tərəfsizlik müddəası əlavə olunarsa, Rusiyanın Gümrüdə yerləşən 102 saylı hərbi bazası ləğv edilməlidir.

Məsələ ilə bağlı Baku TV-yə açıqlama verən rusiyalı hərbi ekspert Boqdan Bezpalko bildirib ki, əgər belə bir hadisə baş verərsə, rəsmi Moskva Ermənistan rəhbərliyini cəzasız qoymayacaq:

“Bu, açıq şəkildə Rusiyaya qarşı düşmənçilik addımıdır. Birincisi, ona görə ki, Ermənistan faktiki olaraq Rusiya Federasiyası ilə müttəfiqlik münasibətlərindən çıxdığını bəyan edir. İkincisi, bu baş verərsə, Rusiya qoşunlarının Ermənistan ərazisindən çıxarılmasını şərtləndirəcək.

Əminəm ki, bu baş verərsə, Rusiya ilə Ermənistan arasında iqtisadi əlaqələr kəsiləcək. Rəsmi Moskva Ermənistan rəhbərliyinin bu cür davranışını cəzasız qoymayacaq. Artıq bunun ilk siqnalları gəlir. Ermənistandan gələn malların sərhəddə yoxlanılması, bu malları Rusiyaya gətirən yük maşınlarının gecikdirilməsi bundan xəbər verir.

Digər variant ondan ibarətdir ki, Ermənistanı hərbi münaqişəyə təhrik edirlər. N.Paşinyan bilməlidir ki, bu baş versə belə, onun istədiyi kimi, Qarabağın Ermənistan təsirinə qaytarılması arzusu reallaşmayacaq”.

Onu da qeyd etmək yerinə düşər ki, tərəfsizlik müddəası əlavə ediləcəyi təqdirdə İrəvan KTMT-ni də tərk etmək məcburiyyətində qalacaq. Bütün bu sadalananların Ermənistan üçün necə nəticələnəcəyini isə zaman göstərəcək.