Fələstinin tərkibində hansı qurum yaradılır? | Mahmud Abbas BMT-də şərtlərini açıqladı

"Fələstinin HƏMAS radikal qruplaşması Qəzza zolağının idarə olunmasında heç bir rol oynamayacaq".

Bunu Fələstin Prezidenti Mahmud Abbas BMT-nin Nyu-Yorkdakı mənzil-qərargahında Yaxın Şərq sülh prosesi üzrə yüksəksəviyyəli beynəlxalq konfransında çıxışı zamanı bildirib.

Onun sözlərinə görə, HƏMAS və digər qruplar silahlarını Fələstin Milli Administrasiyasına təhvil verməlidir.

"Fələstin Milli Administrasiyası silahsız, qanuni təhlükəsizlik qüvvələri ilə vahid dövlət yaratmağa çalışır", ‒ deyə Mahmud Abbas bildirib.

Qeyd edək ki, Fələstinin FƏTH və HƏMAS hərəkatları arasında Misirin vasitəçiliyi ilə Qəzzada müharibədən sonrakı idarəçiliklə bağlı danışıqlar illərdir aparılır. Ən son danışıqlar 2-4 noyabr 2024-cü il tarixlərində Qahirədə baş tutub. Bu danışıqlardan sonra ümumi Fələstin milli konsensus hökuməti formalaşana qədər zolağı idarə etmək üçün məsul olan müvəqqəti qurumun yaradılması qərara alınıb.

Bu struktur "İctimai Dəstək Komitəsi" adlandırılıb. Misir mənbələrinə görə, bu qurum Fələstin Prezidenti Mahmud Abbasın fərmanı ilə yaradılıb və onun tərkibinə qəzzalı olan, lakin heç bir siyasi partiyaya bağlı olmayan müstəqil nümayəndələr daxildir.