Ukraynanın müdafiə naziri Mixayıl Fedorov hesabat yaydı - Baku TV

"İlin əvvəlindən bəri Ukraynanın Müdafiə Qüvvələrinin pilotsuz sistem bölmələri 800 mindən çox təsdiqlənmiş düşmən hədəfini vurub və təxminən 167 min rus hərbçisini öldürüb və ya ağır yaralayıb".

Bunu Ukraynanın müdafiə naziri Mixayıl Fedorov "Telegram"da açıqlayıb.

"Müdafiə Qüvvələri düşmənin hərbi potensialını sistematik şəkildə zəiflədir – logistikanı pozur və düşmən xətlərinin arxasındakı vacib hədəflərə zərbələr endirir", – deyə nazir qeyd edib.

O həmçinin 2026-cı ilin mayının Müdafiə Qüvvələri üçün ən məhsuldar ay olduğunu qeyd edib. Xüsusilə, ay ərzində 181 mindən çox hədəf məhv edilib, 31 530 işğalçı isə öldürülüb və ya ağır yaralanıb.

May ayının sonunda Rusiya Müdafiə Nazirliyi də hesabat yayıb. Məlumatda bildirilir ki, xüsusi əməliyyatın başladığı gündən bəri düşmənin 671 təyyarəsi, 284 helikopteri, 151 504 PUA-sı, 661 zenit-raket kompleksi, 29 450 tank və digər zirehli texnikası, 1724 reaktiv yaylım atəş sistemi, 35 058 artilleriya və minaatanı, 62 334 xüsusi hərbi avtomobil texnikası məhv edilib.