Fırtına İtaliya və Fransaya ziyan vurdu

İtaliyanın cənubunda "Harri" fırtınasının vurduğu ziyan 1 milyard avronu keçib.

Bu barədə regional hakimiyyət orqanları məlumat verib.

Şiddətli küləklər və güclü fırtına dalğaları ölkənin sahil xətlərinə, limanlarına və əsas infrastrukturlarına ciddi ziyan vurub, nəticədə İtaliya Sahil Mühafizəsi tərəfindən genişmiqyaslı xilasetmə və təhlükəsizlik əməliyyatları həyata keçirilib. Fırtınadan ən çox Siciliya və Sardiniya adaları zərər çəkib.

Regional rəsmilərin bildirdiyinə görə, yollara, limanlara, çimərlik obyektlərinə və iqtisadi fəaliyyət sahələrinə yüzmilyonlarla avro dəyərində ziyan dəyib.

İlkin hesablamalara əsasən, ziyanın təxminən 740 milyon avro olduğu açıqlanıb və itirilmiş gəlirlər nəzərə alındıqdan sonra bu rəqəmin artacağı bildirilib.

Təhlükəli hava şəraitinin davam etməsi səbəbindən hakimiyyət orqanları ictimai təhlükəsizliyi təmin etmək məqsədilə bir sıra açıq sahil zonalarının müvəqqəti bağlanması barədə qərar qəbul edib.

Qeyd edək ki, İtaliyaya qonşu olan Fransada da güclü yağışlar daşqınlara səbəb olub. Bretan bölgəsinə yağan güclü yağışlardan sonra Quimperle şəhərində ciddi daşqınlar qeydə alınıb. Şəhərin mərkəzində yerləşən binalar və küçələr su altında qalıb. Məlumata görə, təhlükəsizlik məqsədilə sakinlər daha yüksək ərazilərə təxliyə edilib.